الخميس، 21 مايو، 2009

كروان


كروان وغنّا فى السما معروف غناه.
كل اللى يسمع ياليل وياها عين
يصرخ يقول الله .
يا سلام كمان لما يقول
بصوت مفتول الآه .
الصوت يدوى وسايب بصمته
عمرى ف يوم مانساه.
...
كروان متحكى قصتك
على ناى ربابه وللا أنون .
اصل البكا ويّا السهاد لجلك يهون .
عقل الحكيم
لجل السماع اصبح جنون.
علشان عيونك
لقيت ف نفسى مجنون عيون.
...
متغنى يا كروان واطربنا .
صدقنى يا كروان
سكوت عيونك يتعبنا.
قبل الغنا انده
بصوتك قربنا .
طلبك على راس الامير
بنبيذ عيونك وشربنا.

...
كروان وغنى ...
دى هتبقى جنه.
من غير كلام .
اسقى العوام
يا تمر حنه.
دا الصوت ده منّه.

...
كروان متقعد عندنا وتقول آهات .
وهاتبقى واحد مننا
تطرب حارتنا والناس سكات .
وتغنى حته من حب سومه .
وتشد نجمه من ليل نجاة.
...
كروان كفايه علينا عذاب
بلاش تغيب.
دا يوم غيابك
بيغنى الغراب .
غراب ده ايه؟!!
وايش جاب لجاب؟!
غنيلنا حته لصلاح جاهين
أو حتى غنوة لسيد حجاب.
...
وغنّى يا كروان .
دا القمر وسط النجوم سهران
مليون سنه بيعد فيهم
باين عليه سكران .
غنيله كمل صدمته
وصدق فكرته
عمره ماشاف ألوان .
عايش فى بحر من السواد
ويّا نجوم بيضا
عمره ماشافله اخوات
باين عليه زعلان.
...
غنى بصوتك واملا الفضا
واطرب قمرنا
يمكن..
على ايدك يتهدى.
والطير عشانك
مستنى يسمع غنوتك يخشى القضا.

...
واطرب ملايين البشر .
هز الحجر
فجر عيون السما .
راح تبكى بدموع المطر
وغنّى...

السبت، 16 مايو، 2009


لو بدينا يا حبيبى نبتدى منين المعارك؟
عند دارى؟
عند دارك؟
مش مهم
المهم ان انت دارِك
ان قلبى استدارك
أوم عرف مين اللى حبه واللى حاربه
فى المدارِك.

...
واللى عارف قلبى يعرف
انه مش راح يوم يخرف
أو يقول الكلمه مش زى اللى قالو.
أو يحرف.
...
أصل قلبى .

معروف بناره
واسألو عن حبه جاره
قلوب كتير
يرجعو على قلبى جرى
يندهو أوم واستجارو
عارفين ان قلبى . عمره ف يوم
ما بينسى تاره
...
آآآه يا قلبى . هدى من نارك شويه
دى قلوب ف الحب طازه
يعنى بالعربى الفصيح
القلوب دى . هه طريه
مش قلوب .. مش مستويه

...
لازم تكون دارسهم
مش أكيد بالعين شايفهم
بس طبعا عقلك الواعى حاسسهم
لأ بلاش.. تعمل راسك براسهم

...
بس ميين؟!!

الكلام ده ف قلب غيرى
أما قلبى!

جوه نار تحرق ف طيرى
..
قلبى . يابو الحروب
مرحبا بليل المعارك
فين زمان كلمة بحبك
كان يدوب
ويقول القصايد
كان رومانسى!
لكن انسى
القلب ده مش راح يعاود
...
قلبى نازل عامل حسابو
متفجرات وسلاح! قلبى اللى جابو
كان رومانسى ويا وده
كل ده . واهو راح وسابو
...
الكل ينتظر المعارك والحروب
والانتظار مخلوط بخوف
والاسير فى حروبه دايما
من غير مبادئ
يدبحو زى الخروف
وينادى على كل العساكر

دول أعادى مش ضيوف
وبعلو صوتو
جهزو كل السيوف
والمدافع والقنابل
بعدها دقو الدفوف

.....
يا حبيبى انت مش أد قلبى وقسوته
وللا انت لا مؤاخذه اتهبلت؟
وللا انت ناسى حروبه اللى فاتت؟
أول اشاره ف حربه
راح يبدأ بقلبك
بعدها كل القلوب من الحسره ماتت
وانت ساكت
....
انت عارف قلبى ده ؟!
فى الحروب.
هوه صاحب كل طلقه فى البدايه
كله داخل حرب مش عارف اخرها
بس قلبى .
له هدف وكمان له غايه
والكلام ده يا حبيبى مش تسالى
أو حكايه
أو فى يوم تتسلى بيه
أو تكون حتى معايا؟

...
يا حبيبى ومش حبيبى اللى بحبه
دا حبيبى . تهديد شديد
وبعلو صوتو
قلبى راح ساعه يقولك
هيه دى بداية النهايه
...
هتكون حكاية بتتكتب على حيطه من معبد فى قلبى
كان زمااان . أيام صلاح
حرب من غير أى حد.
وقفت للبحر جزره
وكمان وقفتله كل مد.
على راس حبيبه القصر هد .
وانتهت بالنصر لكن!
كل اللى كان بيحب فى بلاده
بنى على قلبه سد.
وانتهى عصر الحبايب
"والرومانسى"
وانتهى فى بلاده ود
......

الأربعاء، 6 مايو، 2009

جرايد


جرايد .. جرايد

والدم قايد

والفجر مليان هموم

والمصرى اليوم

معدوم

اخباره قديمه زى الاهرام

وصباحو نايم فى مساءو

ينتظر الفجر مع الاحرار

وصباح الخير. من غير

حتى نهار

***

جمهورية خوف

ولا عمره ف يوم هيشوف

واهو وفد وماشى فى صفوف

وان قلنا كواكب وللا نجوم

والشمس معاد ينفعها كسوف

***

يا شروق

باين محروق

والدستور فى ميدان - النور

مشنوق

***

والشرق الاوسط

هيموت من الجوع

فى خلال اسبوع

أو يمكن على اكتوبر الجاى

وبلاش منك تانى دموع..
***
والكلام ده ملوش دليل
غير حكايتى مع البديل
والعالم اليوم
بقى هوه العميل


كفاية كده..

اللى عارف جرايد تانية يقولى


الأربعاء، 8 أبريل، 2009

قصيدة من العصر الجزمى


ايام منتظر الزيدى مضرب بوش بالجزمة كتبت القصيدة دى .


نظراً لحبى للجزم

وأكله حلوة على راس صاحبنا

فى بلاد ابونا اتعزم

يا بوش يا غازى!!

لو ميت(100) منصور؟

بالجزمه !

يبقى اتهزم

مولود بقالى زمان

ييجى ربع قرن قبل عام الجزم

عدى عليّه كتير

ومرت عليّه الجزم

( أسبانى وايطالى وصينى ومصرى)

لكن العراق فيها أم الجزم


******


يا حته من دجله

على الفرات واكله

ولفه ع النيل.

الضرب ما هو مستحيل.

أبداً بالجزم

الدنيا تشهد وعنيه أول شاهد

وعملنا أحزاب للجزم

وكمان عملنا

رابطة محبى الجزم

والحاج كان بيدعيلى

اموت عشان الجزم

يمكن دى دعوة حاج

لسه راجع من الحرم

صارف فلوسه ع الحجاز

جايب هدايا الدنيا

للحبايب والعيال

ترتبع تلاف رابطة جزم


********


يا جزمة الوادى العتيق

على راس العَلَم

الكل مخروس من ساعتها

ولا اللى مضروب بالألم .

وانا اللى فرحان. وزعلان

عشان جوز جزم

راحو هدر

مع منتظر

اللى اكيد راح يتظلم

علشان يعوض جزمه

مضروب بيها صدام قبل ما يتعدم..

ونصيحه ليك يا بوش

قبل أى مؤتمر

تعمل جهاز لكشف الجزم....

** ملحوظة منتظر الزيدى اتحكم عليه بـ 3 سنين واتخفف الحكم لسنة وحدة ..
بس انتظرو منتظر الزيدى ده بطل قومى فى العراق وخدوها كلمة منى..

الجمعة، 3 أبريل، 2009

رئيس الوزرا


رئيس الوزرا انا طبعاً
ومنصب ده ومش طمعاً
معايا القرش من يومى
وواخد السلطة دى شبعاً

*************
وعهد الثورة متخافو
م الفجر راح اشكلها
بحب الشعب من يومى
وعوجة حاجبى راح اشيلها
وزارة وزارة انا عارفها
وزارة لخالتى انا عاملها
*************
ابويا للمالية وزير
قدها وقدود
حمّال للأسية كتير
وحسابه ميحده حدود
وفلوسه زى أى وزير
وكلاها الدود
*************
ومامتى لحقوق الولايا عارفه
وزيرة متخاف أى راجل
ولا حتى من رئيسها خايفه
والنبأ منها خبر عاجل
والناس اهى شاهده
والناس اهى شايفه
************
واخويا واد لعيب
اجيب للشباب حد غيره؟؟!!
لا عيب
سمسار كورجى شيطان
لا تيتش ولا صالح وخطيب
وفاهم فى الكوسه البلدى
وعارف الالاعيب
************
والواد حماده الجاز
خيره علينا
يبقى فى البترول استاذ
اصليه شغال فى بنزينه
***********
أما وزير الصحة
متفوتش من معروف
حداه دكانه يفتحها
معروف بحلاق القريه
يدّى العلاج وصفته
ولا أحسن طبيب موصوف
أما ف عطية الحقن.
اشهد عليه حلوف
************
ونبيل بتاع الوصله
حلفان طلاق ماهى حاصله
غير أن يكون فى وزارتى
لو حتى للاعلام
لو دارت الايام
يمسك وظيفه فى راديو ويفسر الاحلام
************
والبت نوسه جارتنا عليها فى التنضيف
مقدرش انساها فى وزارتى
عليها طشة مقله
وللا فى حتة جبنه مرميه ف طرف رغيف
أصل البعيده جارتى
تفضحنى فى الحارة
وتقول بعلو الصوت
خرجو الواد ده من حارتى

***********
ياسمين حبيبتى يا ياسمين
بتكرهى السلطة انا عارف
لكن عشان خاطرى إمسكى وزارة التموين
ولو مش فاهمه حاجه
نوال ونعيمه وبهانه فرقه بمساعدين
************
أما سعاده وللاعة
عليه دبة فاس.مشهورة
ينفع وزير للزراعه
أول متسمع دودة القطن عنه
تموت مقهورة
بشاعه . من قبل الرضاعه
************
ياااااه مرزوق كان رايح من على بالى
واد فهّيم وبفكره العالى
بسهوله يبقى وزير التعليم العالى
************
وعيب عليك يا مليجى
مقدرش اسيبك ودى تيجى
فى وزارة النقل هجيبك
سوّاق خلاصه وميكانيكى
***********
رئيس وزرا مالى مكانه
مفيش مجامله ولا كرسى عشانه
الكل واحد ووزاره مش دكانُه

************
وفجأه اكتشف ابوه الوزير
يقول بصوته متقوم يا إبنى
وبلاش شخير
بلاش لكاعه
وهات لحافك من تحت السرير..!!!!

الخميس، 2 أبريل، 2009


يا بنت الناس
غريب حِسِك؟
ومن حِسِك
عرفت خلاص
عفريت الهوى مسّك

............
جنانك حبة يهديكى
ويشهد ان انا ليكى
وقلبى يقول : قلبك من مماليكى
ولا وصف البلَغا يكفيكى
ولا سكر مصر يحليكى
يا بنت الناس
..........
يا بنت الناس
الحب ميفرق ما بين
اهل الفالصو واهل الماس
ولا يفرق حبيب عشانه وحيد
ولا يفرق حبيب ونّاس

..........
يا بنت الناس
فقير الهوى يحكيلك
ولو ماتو مراسيلك
أنا آجيلك
ولو عيّبتى على سنى
حديث الهوى. احلفلك
واقول والله انا جيلك
ولو قلتى مشيتى خلاص
برده هناديلك
دانا شمعة
تنور فى ليل العشق قناديلك
........
يا بنت الناس
ولو كنتى غريبة
والسنين غربت قلبى عن قلبك
سيوف الهوى تتسن وتتسم
واسرع من الهوا احاربك
اسيب الحرب شغالة
واطير فى عيونك
واعيش اللحظة والحالة
وتجرى بعيد.
لكن على مين؟؟
دا انا ماشى على دربك
........
يا بنت الناس
قوية وقوتك ضعفك
طاقية الاخفى تخفيكى
لكن على مين؟؟
أنا شايفك.
وحابسة الدمعة ف عنيكى
مانا عارفك..
فى لحظة وثانية بتغيِرى
ولا عمرك
تطيرى ف هوى غير
هوى طيرى.

........
يا بنت الناس
بحبك كلمة مش عارف
اجيبها منين؟؟
ولو حبك قاموس فدادين؟
هفُك كلامه جوه الطين
وأزرع حبه تحييكى
وتكتب كلمة وياها
وحبر الكلمة دمع العين
بعلو الصوت
" حبيبك نفسه يفدييكى "
ولو كانت حياتى فراق
وميجمعنا غير الموت
فأهلا بيه
أنا قاعد ومستنيه..
" ومستنيكى "
يا بنت الناس