الخميس، 21 مايو 2009

كروان


كروان وغنّا فى السما معروف غناه.
كل اللى يسمع ياليل وياها عين
يصرخ يقول الله .
يا سلام كمان لما يقول
بصوت مفتول الآه .
الصوت يدوى وسايب بصمته
عمرى ف يوم مانساه.
...
كروان متحكى قصتك
على ناى ربابه وللا أنون .
اصل البكا ويّا السهاد لجلك يهون .
عقل الحكيم
لجل السماع اصبح جنون.
علشان عيونك
لقيت ف نفسى مجنون عيون.
...
متغنى يا كروان واطربنا .
صدقنى يا كروان
سكوت عيونك يتعبنا.
قبل الغنا انده
بصوتك قربنا .
طلبك على راس الامير
بنبيذ عيونك وشربنا.

...
كروان وغنى ...
دى هتبقى جنه.
من غير كلام .
اسقى العوام
يا تمر حنه.
دا الصوت ده منّه.

...
كروان متقعد عندنا وتقول آهات .
وهاتبقى واحد مننا
تطرب حارتنا والناس سكات .
وتغنى حته من حب سومه .
وتشد نجمه من ليل نجاة.
...
كروان كفايه علينا عذاب
بلاش تغيب.
دا يوم غيابك
بيغنى الغراب .
غراب ده ايه؟!!
وايش جاب لجاب؟!
غنيلنا حته لصلاح جاهين
أو حتى غنوة لسيد حجاب.
...
وغنّى يا كروان .
دا القمر وسط النجوم سهران
مليون سنه بيعد فيهم
باين عليه سكران .
غنيله كمل صدمته
وصدق فكرته
عمره ماشاف ألوان .
عايش فى بحر من السواد
ويّا نجوم بيضا
عمره ماشافله اخوات
باين عليه زعلان.
...
غنى بصوتك واملا الفضا
واطرب قمرنا
يمكن..
على ايدك يتهدى.
والطير عشانك
مستنى يسمع غنوتك يخشى القضا.

...
واطرب ملايين البشر .
هز الحجر
فجر عيون السما .
راح تبكى بدموع المطر
وغنّى...

هناك 33 تعليقًا:

عمرو يقول...

الله الله ..
أشكرك يا عزيزى على ما أمتعتنا به من رقيق كلماتك الشجيه العميقه ..
بالمناسبه ليه الكروان بالذات مرتبط فى التراث الشعبى المصرى بالشجن ؟؟
سؤال دايما بسأله لتفسى ..

ستيتة يقول...

انت اللي كاتب ده؟
مش علشان انت بتكتب وحش
نو ابسلوتلي
بس اصل ده حلو قوي وكأني سمعت الرتم بالشكل ده قبل كده

تحفة

ساره يقول...

الله عليك ياصلاح

دخلتني فى مود الافلام القديمه
واكيد طبعا دعاء الكروان

مسدس صغير يقول...

عمرو
اشكرك على الكلام الجميل اوى ده
بجد نورتنى
وسعيد بزيارتك وعايزين نشوفك على المدونة الرئيسية مدونة مسدس صغير
نورت يا باشا

مسدس صغير يقول...

ستيتة
اللى تشوفيه عليه ماشى
لو عايزة اكون مش انا اللى كاتبه خلاص
اوك انا مش موافق
هههههههه
اتفضلى ميغلاش عليكى
بجد سعيد بتعليقك جدا فى مدونتى المتواضعة دى
نورتى البلوج

مسدس صغير يقول...

سارة
متشكر جدا على الكلام الحلو ده
مبسوط اوى اوى بتواجدك
نورتى البلوج
سلامى

وردة يقول...

من اكتر الحاجات اللي بتفائل بيها صوت الكروان
بجد صوت جميل
وكلامك جميل جداااا
"متغنى يا كروان واطربنا .
صدقنى يا كروان
سكوت عيونك يتعبنا.
قبل الغنا انده
بصوتك قربنا .
طلبك على راس الامير
بنبيذ عيونك وشربنا."
جميلة اوووي
ربنا يكرمك
سلام

مسدس صغير يقول...

وردة
انا فرحان اوى والله انك عثرتى على مدونتى دى وعلقتى عندى
اشكرك على الكلام الجميل ده
نورتى البلوج

قلب ارهقته الاحلام يقول...

الله الله ياصاصا

ايه الجمال ده بجد خيااااال

تشبيهاتك فيها فوق الرائعة ورقيقة اوي

وناعمة وهايله لا لا لا لا مش مصدقة

انت ال كاتبها ؟؟ احلف احلف :-p

يااااه كان فين البوست ده من زمان

عشان ادخل التاريخ :)

دمت بألف خيرر

تحياتي ,,

مسدس صغير يقول...

قلب ارهقته الاحلام
خيال حتة واحدة؟؟
ههههههههه
ميرسى على الكلام الحلو ده
لا صدقى
انا
بعد كده هحلف بس بين قوسين جنب عنوان البوست كده
هههههههههه
ادخلى التاريخ
مرحبا بكى فى الصفحة رقم 200000000000 فى التاريخ

د. ياسر عمر عبد الفتاح يقول...

تسلم إيدك
كلمات رائعة

مسدس صغير يقول...

د/ياسر
اشكرك على التعليق
نورتنى

فتاه حالمه يقول...

ايه ته ايه ته
تول ته انت كتبه يا سدس
بس نحفه اصله خالص
حلو اوي بجد وتحس انه اغنيه كدا يعني
بجد تحفه
بطلنا تفجير بعد الكلام الحلو ده
اول مرة ادخل هنا ومسيطاك اهه
هههههههههههههههههه

مسدس صغير يقول...

فتاة حالمة
ههههههههه
نورتى المدونة طبعا
اول زيارة بس مش عايزينها اخر
تيجى هنا كل يوم تلات مرات قبل الاكل
ههههههههه
اشكرك على الكلام الحلو ده
نورتى

لاسع افندى يقول...

جميله جدا


تحيه
تحيه
تحيه

عمرو وجيه يقول...

الله الله

بجد تحفة فعلا
خصوصا الحتة دي

كروان كفايه علينا عذاب
بلاش تغيب.
دا يوم غيابك
بيغنى الغراب .
غراب ده ايه؟!!
وايش جاب لجاب؟!
غنيلنا حته لصلاح جاهين
أو حتى غنوة لسيد حجاب.


________________



أجدت حقا في تعبيرك


سلمت اناملك

مسدس صغير يقول...

لاسع افندى
اشكرك يا باشا على الزيارة والتعليق
نورتنى

مسدس صغير يقول...

عمرو وجيه
اشكرك يا باشا على التعليق الجميل
سعيد بمرورك
نورت المدونة

همسة ايمان يقول...

لابجد فعلا روعه على الاخر

كلمات بسيطة كدة وممتعه جدا

بجد مدونتك كلها عسوله خالص

طبعا تى اول مرة وان شاء الله متكونش الاخيرة

تقبـــ مرورى ــل زائرة وجديدة فى عالم التتدوين

ابو المفاصل الواصل يقول...

تجميل القبح
اقتصر دورنا على تجميل القبح وليس تغييره
ولنا ابداعات بديعة فى تسويق القبح وتسيره
اما الجمال فشجره مال وكعب داير تم تدويره
برجال بقوة الافيال وعقل البغال تم تــصـد يره
و بقية الخيال الخالى من الاستهبال يتم تحويره
ليصب فى خانة قبح تقبح وبالحسن يتم

micheal يقول...

كلمات رقيقة جدا بس بقالك فترة مش بتكتب ليه؟
تحياتي

المسلم الصغير يقول...

السلام عليكم.. كل عام وأنت بخير.. أنا مسلم.. نعم اسمي مسلم.. أنا سعيد والحمد لله بميلادي مع شهر رمضان المبارك وسأكون سعيدا أكثر بزيارتك..
وجزاك الله كل خير فيما قولت

كلام على بلاطة يقول...

كل عيد تعيش فى سلام وتعيد
وتعلو وتسمو ..وعلى نفسك تتسيد
ولا يتحكم فيك اى من كان عبد ولا سيد
وعن الشرور تنأى بعيدا وتتحيد
وتجود بخيرك لغيرك وتكون الجيد
وتصفو وتسامح ولا تكون ابدا كيد
وبالاخلاق والمثل والقيم تتقيد
وتقيم جسور الحب والود وتشيد

Tarkieb يقول...

كلام جميل اوووي ....بس الصورة بتاعة كوكتيل مش كروان ياباشا...بس بجد ولا صلاح جاهين نسميك بقى سلاح جاهين....

اللى موش عارف يتغير يقول...

معرفش ليه انا مركز على المدونة الرئيسية ومبجيش هنا خالص ليه
رغم ان هنا جميل والله
اسف
هاجى وكتير كمان

ايمان روحي يقول...

كلمات جميله
سلمت اناملك
دمت ودام قلمك المبدع
تحيـــاتي

غير معرف يقول...

رااااااااائع

ايه الجمال دا

عنجد ابدعت بصياغة الكلمات

تسلم ايدك

عاشق الجنة من الإخوان صلى على النبى يقول...

ايه الكلام الجميل ده
صلي علي لنبي

هناء محمود يقول...

تصفيق حااااااد مع تصفير يصنج الودان

-_- يقول...

جميلة

غير معرف يقول...

ايه الكلام الجامد ده؟؟ ربنا يديم عليك الابداع على طول ودايما وجدااااا

^_^

مها ميهوووو

غير معرف يقول...

السلام عليكم ورحمه الله وبركاته
كلفنى الاستاذ بيرم المصرى بارسال هذه التحيه لجميع الاصدقاء وذلك لتعذر قيامه بها بشخصه
(اجمل التهانى واطيب الامانى للجميع بمناسبه عيد القيامه المجيد وشم النسيم)

ورد الغصون...

نيابه عن بيرم المصرى
صاحب مدونه كرباج سودانى

كلام على بلاطة يقول...

جميل يا عميرى جميل